Դեսպան Մոնիկա Սիմոնյանը հանդիպում է ունեցել Ճապոնիայի արտաքին գործերի պետնախարար Յասուտակա Նակասոնեի հետ

27 հոկտեմբերի, 2026

Հոկտեմբերի 27-ին Ճապոնիայում Հայաստանի դեսպան Մոնիկա Սիմոնյանին ընդունել է Ճապոնիայի արտաքին գործերի պետնախարար Յասուտակա Նակասոնեն։

Դեսպան Սիմոնյանն արձանագրել է, որ Հայաստանի և Ճապոնիայի փոխհարաբերություններում առկա է կայուն դինամիկա և մի շարք ոլորտներում՝ համագործակցության զարգացման զգալի ներուժ։

Դեսպանը կարևորել է քաղաքական ակտիվ երկխոսության շարունակականությունն ու բարձրաստիճան փոխայցելությունների իրականացումը, ընդգծել տնտեսական կապերի խթանմանն ու երկկողմ առևտրաշրջանառության ծավալների մեծացմանն ուղղված համատեղ աշխատանքի անհրաժեշտությունը, ներառյալ՝ հայկական ապրանքների՝ ճապոնական շուկա ներմուծման հնարավորությունների լիարժեք գործարկումը։

Պետնախարար Նակասոնեն նշել է, որ Վարչապետ Փաշինյանի՝ նախորդ տարվա սեպտեմբերին Ճապոնիա կատարած այցը երկկողմ հարաբերությունների առաջմղման համար կարևոր հանգրվան է հանդիսացել՝ հույս հայտնելով, որ համագործակցությունը հետայսու ևս կամրապնդվի, ներառյալ՝ տեղեկատվական տեխնոլոգիաների և արհեստական բանականության ոլորտում՝ որպես օրինակ մեջբերելով Գունմա պրեֆեկտուրայում գործող «ԹՈՒՄՈ» կենտրոնը։

Կողմերը մտքեր են փոխանակել տարածաշրջանի անվտանգային իրավիճակի և Հարավային Կովկասում կայուն խաղաղության հաստատմանն ուղղված ջանքերի շուրջ։ Դեսպան Սիմոնյանը ներկայացրել է Հայաստանի կառավարության «Խաղաղության խաչմերուկ» ու «Թրամփի ուղի՝ հանուն միջազգային խաղաղության և բարգավաճման» նախագծերի իրականացմանը միտված զարգացումները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր