Հայաստանի Հանրապետության Անկախության 35-ամյա տարեդարձի առիթով Ճապոնիայում Հայաստանի դեսպանությունը կազմակերպել է պաշտոնական ընդունելություն։

28 սեպտեմբերի, 2026

Սեպտեմբերի 28-ին Հայաստանի Հանրապետության Անկախության 35-ամյա տարեդարձի առիթով Ճապոնիայում Հայաստանի դեսպանությունը կազմակերպել է պաշտոնական ընդունելություն։

Միջոցառմանը, որպես պատվավոր հյուրեր, մասնակցել են Ճապոնիայի արտաքին գործերի պետնախարար Յասուտակա Նակասոնեն, Ներքին գործերի և հաղորդակցությունների նախարար Հիսայուկի Ֆուջիին, Լիբերալ - Դեմոկրատական կուսակցության Գլխավոր քարտուղար, Ճապոնիա - Հայաստան խորհրդարանական բարեկամական խմբի ղեկավար Շունիչի Սուզուկին, Ազգային Դիետի Ներկայացուցիչների պալատի պատգամավոր Կացույուկի Վատանաբեն։

Երկու հարյուրից ավելի հյուրերի թվում էին Ճապոնիայի կառավարության պաշտոնյաներ, Տոկիոյում հավատարմագրված երկրների դեսպաններ, դիվանագետներ, ճապոնական ընկերությունների գործարարներ, գիտության, կրթության, մշակույթի ոլորտների ներկայացուցիչներ, հայ համայնքի անդամներ։

Դեսպան Մոնիկա Սիմոնյանն իր ուղերձում անդրադարձել է Հայաստանի կառավարության հանձնառությանը տարածաշրջանում խաղաղության ամրապնդմանը՝ փոխկապակցվածության ընդլայնման և տնտեսական հնարավորությունների կյանքի կոչման միջոցով։ Ներկայացրել է ընթացիկ տարում Հայաստան - Ճապոնիա հարաբերություններում արձանագրված ձեռքբերումները՝ առանձնացնելով քաղաքական երկխոսության ակտիվացումը, տեղեկատվական տեխնոլոգիաների և գինեգործության ոլորտներում շարունակական համագործակցության հաստատումը։

Արտաքին գործերի պետնախարար Յասուտակա Նակասոնեն խոսել է հայ – ճապոնական բարեկամական կապերի ամրապնդման հեռանկարների մասին՝ կարևորելով առևտրի, տեխնոլոգիաների, նորարարության ոլորտներում փոխգործակցության ընդլայնումը, ինչպես նաև 2027 թվականին Հայաստանի և Ճապոնիայի միջև դիվանագիտական հարաբերությունների հաստատման 35 – ամյակին նվիրված համատեղ միջոցառումների անցկացումը։

Ճապոնիա - Հայաստան խորհրդարանական բարեկամական խմբի ղեկավար Շունիչի Սուզուկին արձանագրել է երկկողմ հարաբերությունների՝ վերջին տարիների զարգացման դինամիկան՝ ակնկալիքով, որ միջխորհրդարանական կապերն առաջիկայում ևս կամրապնդվեն։

Պատգամավոր Կացույուկի Վատանաբեն ընդգծել է Հայաստանի և Ճապոնիայի միջև խորհրդարանական, տնտեսական, մշակութային փոխանակումների առաջմղմանն ուղղված ջանքերը։

Ընդունելությանը հայկական ժողովրդական ստեղծագործություններ և պարեր են ներկայացվել ճապոնացի արտիստներ՝ տենոր Տոշիկի Օնոի, դուդուկահար Ֆուջիկավա Շոի և «Մենք Ճապոնիա» հայկական ժողովրդական պարային խմբի անդամների կատարմամբ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր