ՀՀ դեսպանությունում տեղի ունեցավ «Ճապոնիայի Կոմիտասի անվան երաժշտական ընկերության» հոգաբարձուների խորհրդի անդրանիկ նիստը

06 հունիսի, 2016

Հունիսի 6-ին տեղի ունեցավ «Ճապոնիայի Կոմիտասի անվան երաժշտական ընկերության» հոգաբարձուների խորհրդի անդրանիկ նիստը: Քննարկվեցին ընկերության նպատակները և ծրագրերը, հաստատվեց ղեկավար կազմը և կանոնադրությունը։ Ընկերության հոգաբարձուների խորհրդի նախագահն է հայտնի դաշնակահար Տակահիրո Ակիբան, որը հաճախ է համերգներով հանդես գալիս և՛ Հայաստանում, և՛ Ճապոնիայում՝ կատարելով հայ երգահանների գործերը։

Հայ հոգևոր, ժողովրդական և դասական երաժշտությունը ներկայացնելու առաքելություն իրականացնող ընկերության պատվավոր անդամներն են Կոմիտասի անվան լարային քառյակի գեղարվեստական ղեկավար Էդուարդ Թադևոսյանը, ականավոր օպերային երգչուհի, սոպրանո Արաքս Մանսուրյանը, հայտնի դաշնակահար Անահիտ Ներսիսյանը։ Ընկերության պատվավոր նախագահն է Ճապոնիայում ՀՀ դեսպան Հրանտ Պողոսյանը։

Հայոց ցեղասպանության 100-րդ տարելիցի կապակցությամբ 2015թ․ սեպտեմբերի 26-ին՝ Կոմիտասի ծննդյան օրը, հիմնադրված «Ճապոնիայի Կոմիտասի անվան երաժշտական ընկերության» առաջնահերթ նպատակն է հայ մեծանուն երգահան Կոմիտասի երաժշտական ժառանգության կատարումը, ուսումնասիրումը և հայ երաժշտության մասին տեղեկացվածության բարձրացումը Ճապոնիայում։ Ընկերությունն իր գիտակրթական և կատարողական գործունեությամբ նպատակաուղղված է երաժշտության ոլորտում զարգացնել Ճապոնիայի և Հայաստանի միջև մշակութային կապերը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր