<<IT’s Armenia>> խորագրով սեմինար Տոկիոյում

13 սեպտեմբերի, 2013

Սեպտեմբերի 13-ին Ճապոնիայում Հայաստանի դեսպանությունը Տոկիոյում կազմակերպել էր <<IT’s Armenia>> խորագրով սեմինար, որին աջակցում էին Ճապոնիայի արտաքին առևտրի կազմակերպությունը (JETRO), Ճապոնիայի արտաքին գործերի նախարարությունը, Տնտեսության, առևտրի և արդյունաբերության նախարարությունը, Ռուսաստանի և նորանկախ պետությունների հետ տնտեսական համագործակցության կազմակերպությունը (ROTOBO) և Ճապոնիայի առևտրաարդյունաբերական պալատը (JCCI):

Սեմինարը նվիրված էր Հայաստանի տեղեկատվական տեխնոլոգիաների ոլորտին, որը ներկայացնելու նպատակով դեսպանությունը Տոկիո էր հրավիրել
«Ձեռնարկությունների ինկուբատոր հիմնադրամ>>-ի տնօրեն Բագրատ Ենգիբարյանին, <<Instigate CJSC>>-ի համահիմնադիր և տեխնիկական բաժնի ղեկավար Վահագն Պողոսյանին, <<Viasphere International and Viasphere Technopark>>-ի ղեկավար Տոնի Մորոյանին (ԱՄՆ), <<Mentor Graphics Corp.>> -ի ինժեներական բաժնի տնօրեն Արա Մարկոսյանին (ԱՄՆ): Սեմինարին մասնակցեցին ճապոնական ընկերությունների, գիտահետազոտական կենտրոնների, պետական կառույցների մոտ 150 ներկայացուցիչներ:

Միջոցառման բացմանը ելույթ ունեցավ դեսպան Հրանտ Պողոսյանը՝ ներկայացնելով հայ-ճապոնական հարաբերությունները, իրականացվող աշխատանքն ու գործակցության խորացման հնարավորությունները:
Այնուհետև ներկաներին ողջույնի խոսքով դիմեց SSIS (Society of Semiconductor Industry Specialists) կազմակերպության նախագահ, <<Hitachi>> ընկերության նախկին գործադիր տնօրեն Ցուգիո Մակիմոտոն, ով խոսեց կիսահաղորդիչների արդյունաբերության զարգացման ուղիների, մասնավորապես՝ <<Makimoto Wave>> անուն ստացած միտումների, իր գործունեության ընթացքում ձեռք բերած փորձի և հաջողության հասնելու սկզբունքների վերաբերյալ:

Սեմինարի զեկուցողները համակողմանիորեն ներկայացրեցին Հայաստանի ՏՏ ոլորտի առանձնահատկությունները, վերջին 20 տարում իրագործված ծրագրերը, համագործակցության և ներդրումային հնարավորությունները, Հայաստանում արդեն իսկ հաջողությամբ գործունեություն ծավալած ընկերությունների փորձը և ոլորտի զարգացմանն ուղղված առաջիկա անելիքներն ու ակնկալիքները: Ճապոնական ընկերությունները հրավիրվեցին մասնակցելու հոկտեմբերին Հայաստանում կայանալիք <<ArmTech Congress>> և <<Dijitec Expo 2013>> միջոցառումներին:

Սեմինարի ավարտին տեղի ունեցավ ընդունելություն, որի ընթացքում հայ և ճապոնացի մասնագետները զրուցեցին ընդհանուր հետաքրքություն ներկայացնող հարցերի և Հայաստանում ճապոնական ընկերությունների ներգրավման հնարավորությունների վերաբերյալ: Ճապոնացի մասնակիցներից շատերը նշեցին, որ Հայաստանի նվաճումները ՏՏ ոլորտում իրենց համար անակնկալ էին, և միջոցառումը նպաստեց ՀՀ-ի հետ համագործակցելու հետաքրքրվածության խորացմանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր