ՀՀ Անկախության 23-րդ տարեդարձին նվիրված միջոցառում Տոկիոյում

26 սեպտեմբերի, 2014

Սեպտեմբերի 26-ին ՀՀ Անկախության 23-րդ տարեդարձի առթիվ Ճապոնիայում ՀՀ դեսպանությունը կազմակերպել էր ընդունելություն:

Տոկիոյի «Հոթել Օկուրա» հյուրանոցի սրահում հյուրընկալվեցին ավելի քան 250 հյուրեր՝ Ճապոնիայի խորհրդարանի, կառավարության, պետական այլ կառույցների, գործակալությունների բարձրաստիճան պաշտոնյաներ, դիվանագիտական ներկայացուցչությունների ղեկավարներ, դիվանագետներ, Ճապոնիա-Հայաստան ընկերակցության, ճապոնահայկական բարեկամության միության անդամներ, գործարարներ, համալսարանների ղեկավարներ, արվեստագետներ, լրագրողներ:

Միջոցառման մեկնարկին հյուրերին ողջունեց Ճապոնիայում ՀՀ դեսպան Հրանտ Պողոսյանը: Նա մասնավորապես անդրադարձավ անկախության 23 տարիների ընթացքում Հայաստանի ձեռքբերումներին, մարտահրավերներին և երկրի զարգացմանն ու առաջընթացին ուղղված անելիքներին: Դեսպանը գոհունակություն հայտնեց հայ-ճապոնական տարեցտարի սերտացող հարաբերությունների առիթով՝ նշելով, որ Հայաստանն առավել ճանաչելի է դարձել ճապոնացի հասարակությանը, և հետաքրքրության ոլորտներն ու համագործակցության հեռանկարներն առավել ընդլայնվել են:

Այնուհետև Ճապոնիա - Հայաստան խորհրդարանական բարեկամական խմբի նոր ղեկավար Սեյշիրո Էտոն շնորհավորական ուղերձ հղեց Հայաստանի ղեկավարությանը և հայ ժողովրդին: Նա նշեց, որ Հայաստանն ու Ճապոնիան իրենց գործընկերությունն ու բարեկամությունը խորացնելու համար արդեն իսկ ակտիվ և հագեցած օրակարգ ունեն, և պատրաստակամ աշխատանքի շնորհիվ հնարավոր է իրականացնել օրակարգի բազմաթիվ հարցեր: Պատգամավորը վստահություն հայտնեց, որ հաջորդ տարեսկզբին Հայաստանում բացվող Ճապոնիայի դեսպանությունը ևս կնպաստի համատեղ աշխատանքի արդյունավետությանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր